Двајца градежни работници загинаа по пад од кран во Кавадарци.

Несреќата, според првичните информации, се случила утринава околу 9.40 часот при монтирање на кранот на градилиштето каде биле поставени темелите на зградата. Од засега непознати причини, кранот се откачил и работниците паднале од голема висина. Брзата помош констатирала смрт на лице место.

Загинатите работници се од Скопје на возраст од 30 и 50 години. Нема други повредени лица.

Од Основното јавно обвинителство од Кавадарци информираат дека се преземени сите мерки за утврдување на причините за несреќата. Како што велат оттаму, издадена е наредба за обдукција на телата на починатите, а се прибираат и сите вербални и материјални докази за испитувања на сите околности. Увид вршат и МВР и надлежен инспектор од Трудовиот инспекторат.

Овој случај повторно го отвора прашањето дали и колку се почитуваат стандардите за безбедност и заштита при работа. Првиот човек на ресорното здружение, Милан Петковски, вели дека целиот синџир – од надзор па се до спроведување на препораките во пракса – за жал не функционира и затоа, како што вели, се уште се праќаат работници на небезбедни места со несоодветни услови.

Статистиката на Здружението вели дека минатата година починале 9 градежници на работното место а 30-тина биле потешко повредени.

Hits: 1

Posted in Несреќи при работа, Прес / Медиа.